پاییزلییب هاوارلار گلشنیم خزان اولموش
باهار باتیبدی یاسا مونیسیم فغان اولموش
قاباقدا داغ دره دن تولکی قورد سسی گلیری
باتیبدی گون یوخ آ ی اولدوز هاوا دومان اولموش
سسیمی یوخ ایشیدن آز قالور نفس دایانا
گناهمیز نه دی کی حالیمز یامان اولموش
دوتوب دومان گوزومی دای گورنمیرم قاباغی
ایتیرمیشم یولی یئل مندن ال دوتان اولموش
یاغیش یاغیب گلوری سئل بوتون دره دولوسی
اومید کورپوسی باشدان باشا ایلان اولموش
اولار کی خوش گونی یولداش اولاردیلا منله
هاموسی زالو کیمی ایندی قان سوران اولموش
آچیب دی سفره سینی هریانا اگرچی فلک
بیرسی اولسادا یاغلی مینی یاوان اولموش
زمانه دوسلاریمی بیر به بیر الیمدن آلیب
قالانلاریندا سوزی وعده سی یالان اولموش
هایانداسان منیم ای باوریم ایشقلی سحر
گزور گوزوم سنی یوللاردا بی نیشان اولموش
بو اینتیظار ی قوتار گل بیزه اومید گتور
کی حسرتین قالانیب داغ کیمی قالان اولموش