باغلانیب اورگیم سنین عشقیوه
آنام آچان گوندن بلکدن منی
غم سیخیب خوش گونه حسرت قالمیشام
قارقی ییب کیم بئله اورگدن منی
هر نه یه گولموشدوم گلدی باشیما
سویوخ سو قاتیبدیر فلک آشیما
باخان یوخدی گوزدن اخان یاشیما
آتیللا داغ داشا سورپکدن منی
دالونجا دولانیب دوشدوم چوللره
اوزومی آتمیشام اوتا سئللره
باغلانوب اورگیم قرا تئللره
چکوبله زنجیره بیلکدن منی
بیلمم نولوب بخت اولدوزوم باتیب دی
کروان گچوب منیم آتیم یاتیبدی
عومور بویی منی آتیب دوتوبدی
گئچیردیبدی فلک الکدن منی
هر گلن هر گیدن منی داشلاییر
اوزومده قان گوزومده یاش خوشلاییر
نه اولدورور منی نه ده بوشلاییر
ایاقیمدان آسیب دیرکدن منی
جانیما یانموری منه جان دیین
بیر سفره باشیندا دوز چورک یین
اوزومده خوش دییوب منیله گولن
اوخلیور دالیدان کورکدن منی
قورتاریب جفالر مندن دووزمی
اتمیشام سارا تک سئله اوزومی
گورسوز دیلیم دوتمور دییم سوزومی
سوروشون حالیمی فلکدن منی